Act 15 | WSK | STEP | Bare kari sang Judea beteman ale Antioch taiman, ale Kris alo iwita nunga manarukasan, “Nina ningimik guang batoga ko munan Moses balam mu me karo tual, mu Kaem me ninga giokko.”

Acts 15

Biguwura biya Jerusalem wonong te iluman

1 Bare kari sang Judea beteman ale Antioch taiman, ale Kris alo iwita nunga manarukasan, “Nina ningimik guang batoga ko munan Moses balam mu me karo tual, mu Kaem me ninga giokko.” 2 Nuna uwuta balukasan, se Paul Barnabas ilak den mu ko ninguru nongomang magaram se arungu den te nunumi ilukasan. Se Kris alo balman, Paul Barnabas ilak se kari saki arungu Jerusalem namomon ale apostle alo, se supuling saki arungu, den mu ko munakomonko balman. ^{▼▼Acts 15:1-2 Ikup aratam: Galatians 2:1-2.}

3 Ale nunga beteman se aolak iluman nama se, Kris alo Phoenicia ningi / sor te se Samaria ningi / sor te mu nunga manarukasan, sor saki ko kariimet Juda ko mena mu giris palagaman makasan, se Kris alo den mu ikiman ale ninguru amilmilakasan.

4 Nuna nama Jerusalem arataman, se Kris kariimet se apostle alo se Kris supuling supuling nuguting iluman, ale balukasan terong taiman makasan, ale arungu amilmilakasan. Se Paul Barnabas ilak Kaem nunga ura ningi munan suen biya bitakaso mu ko dugu duap balukasan.

5 Bare Kris sang, nuna Pharisee kari tala bagakasan, mu nuna barasaman ale balukasan, “Kris kari Juda ko mena wore nunga maonal se karogotala nungumik guang batutumumon ale Moses ko Law Den karo tumonko,” makasan.

6 Se apostle alo se supuling saki den mu nungurmonko tai biguwuman. 7 Nuna den singir biya balukasan, asele Peter barasu sanamaram ale nunga maonam, “Aga singsang, nina ikisan, ulengkala Kaem nenenga ningi aninga balam, ali sor saki ko kariimet ani agiring te den gilalong yawara ikimon ale nongomang ningi nunguning arukko mam. ^{▼▼Acts 15:7-9 Peter Cornelius ko kawam te: Acts 10:1-44.} 8 Kaem kariimet nunga nongomang motam ikiwoso, mu nu ali sor saki ko kariimet nuna nogo ko gomang nungeram mu mel imi te nanga kausam: nu Korang Bur ana Juda nangaram iwitatala, nuna nungaram. 9 Nu ananangate kilek bo kigilik beteram, ale nonongate kilek bo kigilik me beteram. Mena. Nuna noko nongomang ningi nunguning aram, se mu te nunga memek siwuram. 10 Se nina awuk se Kaem gomang magurukko atumu atumu tasan ale mel ikup Kris alo nubiwinang te ituwuralko ago kaesan? Mu anananga girigir alo gimonko me terong, se aitak ana ginakko me terong tala! ^{▼▼Acts 15:10-11 Peter mu Law Den ko baluwoso: Mat 23:4: Gal 3:10; 5:1; Gal 2:16. Mat 11:28-30 ago arikko.} 11 Uwuta me betenakko/ralko! Mu awuk, ana ikisan, Kaem gomang nangaram ale nanga Biya Jesus beteram se tai kueram umu te nu ana Juda nanga giam, nu nunga giam iwitatala.”

12 Nu uwuta balam se kari biguwuman animan mu suen la kawus maman ale Paul Barnabas ilak nunga den iki se bagakasan. Se nuna ilagala kariimet motam saki ningi ura bitawakasan se Kaem kilek ningo ningo nunga ura ningi bitakaso, mu ko dugu duap balukasan.

13 Nuna ilagala munaka kutuwuman, se James ^{▼▼Acts 15:13 James imitang mu Jesus ko uria.} mu balam, “Aga singsang,” mam, “aninga den ikialko. 14 Kaem kariimet motam saki nongote namaram ale nunga ningi kariimet noko nup patawu se bagomonko mu nunga giam, mu ko dugu duap maingkala Simon-Peter nanga maonam. 15 Se mel aratam umu prophet giriman ko balman. Mu Kaem ko batoga te iwita batagorman se aniso:

16 ‘Udagi ani pelerik tairik, mu David ko kawam dagulam mu ani patawirikko, parasaram mu ani nungekkowo.
17 Se kariimet saki Juda ko mena,
aninga ma balem se anisan,
mu aninga kupumon ale aga ikimonko.
18 Girakala Kari Biya den imi balam se ikiman, ale aitak aking iwitatala balso.’
19 “Se aninga ikia mu iwita: kariimet Juda ko mena, aitak giris palagasan ale Kaem kote namawasan, mu ana ura kowar me nungarnakko. Mena. 20 Ana tam gawa bataguru nungarnak, ale umu te den iwita nunga manornakko: Nina na inang kariimet saki nungurmon ale kaem kawel nunup te patawomonko mu me nalko. Ale saman katagot me beteralko. Ale mel bo dogotak moa irukumon se kueruk mu ko nunguning me nalko. Ale melsak gue karogo betela me nalko. ^{▼▼Acts 15:20 Melsak gue karogo: Gen 9:4.} Ana uwutata nunga manornakko. 21 Mu awuk, ulengkala nunguningkiri se tai aitak, sor suen biya te kari nuna Moses ko den balmonko mu karogo. Nuna noko den nononga synagogue ningi Sabbath suen biya te kausan.”

Nuna tam gawa bataguru sor saki ko Kris alo nungarman / Kris alo Juda ko mena mu nungarman

22 Asele apostle alo se Kris supuling supuling se Kris suen la mu kari saki nunga balmon se Paul Barnabas ilak arungu Antioch namomonko wore ko den nungurman. Ale nunga supuling ningi Judas ko nup bo Barsabbas mu se, Silas buta nunga balman. 23 Ale tam gawa bo nungarman, gimon ale ago namomonko. Tam gawa iwita balam:

Ana nenenga sikisaki, apostle alo se kari supuling supuling Jerusalem ningi bagasan, mu tam gawa imi batagorman, ale nina sor saki ko Kris alo, Antioch Syria Cilicia ningi bagasan, mu ningarsan. Woremkalal yawara.

Ana den iwita ikiman, anananga ningi kari sang nengete namaman ale ningimik guang batoga ko den owore te ngual ningarman, se ikia biyala ninga moso. Bare kari sumu den sumu ninga manarmonko ana me nunga manorman se namaman.

25 Buta se ana biguwuman ale den nungurman, kari saki nunga balnak se anananga singsang yawara Barnabas Saul arungu nengete namomonko balman. 26 Barnabas Saul ilak anananga Biya Jesus Kristus nup paguk ale sor suen biya taukko ko ura bita se mu, nunga nungumik guang momon maguwumonko me nguangakasan. 27 Buta se ana Judas Silas ilak nunga manorman se kari ilagala mu arungu nengete namasan. Ale nuna den ana tam gawa te batagorman imi turantala nuguring te ninga manarmonkowo. 28

Korang Bur ana nangarak bagaram se ana den imi iwita nungurman: Ana ikup bo nina ningimik te me betenakko. Munan imi la karo tualko:

29 Nina na mel kariimet saki nungurmon ale kaem kawel nunup te patawomonko mu me nalko. Ale nina melmasak gue karogo mu me nalko. Ale mel bo dogotak te moa irukumon se kueruk mu ko nunguning me nalko. Ale saman katagot me beteralko. Nina mel umu suen la beteralko nguangaral, mu nina munan yawara betesan. Butata. Se nanga singsang, yawarakala bagaralko.’ 30 Se (Kris alo) / supuling alo kari namomonko mu nunga awuman se Antioch namaman. Ale sor mu te Kris alo nunga biguwuman, ale tam gawa nungarman. 31 Se kauman ikiman ale ko ninguru amilmilaman.

32 Judas Silas ilak mu nuna prophet tala. Ale nuna Kris alo den ningo suen biya nunga manarukasan, ale nongomang sokel tuikasan. 33 Nuna tom maiya nuam Antioch bagakasan. Ale tom pelemonko mu te Kris alo nongomang lila ko amilmil nungarman, se peleman kari nunga awuman se taiman mu nongote namaman. 34 ^{▼▼Acts 15:34 Batoga saki girakala batagorman mu te den imi ago aniso: “Bare Silas ikiam nu am Antioch bagurukko mam.”} 35 Bare Paul Barnabas ilak am Antioch baga se kari suen biya arungu Kari Biya ko dugu duap kariimet nunga manaru se nunga kasuru se bagakasan.

Paul Barnabas ilak nunumi beteman ale kirker namaman

36 Tom sang namaram se Paul Barnabas maonam, “Analak pelenak ale nanga singsang sor suen biya te maingkala Kari Biya ko dugu duap nunga manorman bare aguwaya anisan wore nungarkanakko.” 37 Se Barnabas nu John ko nup bo Mark mu tamon se arungak namurukko balukaso. 38 Bare Paul miakaso. Ale balam, “Kari imi ulengkala ana nangarak tai Pamphylia nu peleram, ale ana nangarak ura me tam. Buta se ana nangarak me namurukko,” mam. ^{▼▼Acts 15:38 John ko nup bo Mark: Acts 13:13; Col 4:10; 2 Tim 4:11.}

39 Nuna ilagala den ninguru tagikasan. Ale nunumi beteman kirker. Barnabas Mark tam ale dal te aragaman Cyprus namaman. 40 Se Paul Silas tam ale namakasan, se Kris alo nunga manorman, “Kari Biya nengerak namuruk ale ninga sinar taukko,” maman. Nu aolak iluwam nama Syria se Cilicia ningi Kris alo nongomang motam sokel tuikaso.

41